Коли я вмру, ни буде нич страшного

Менї - уже, а вам, живым, - ищи.

Тать бо поправдї, што кому до того,

Ош хрест могилный груди ми строщив.

Коли я вмру, нитко и ни замітить,

Ош меже вами вже мене ниє,

Бо й дале сонце пüвдобы лем світить,

А пüвдобы всьо темнотї дає.

Мене ни было до житя, й ни буде

После житя. Хоть - што житя было ?! –

Менї мішали жити свої люде,

Пущавучи в ня мийриг свüй и зло.

Типир, коли судило ми ся вмерти,

Уже м на тому світї врозумів,

Ош мало уд народжіня до смерти

Чилянник має чистых, світлых дньüв.

Типир, коли умер им, добре знаву:

По смерти ниваловшно каятя.

А щи - живым вам - тайно сообщаву,

Ош смерти бывать бüлше, ги житя !

                            ***
Мої стихы ищи й иннись ни знавуть,
Ош я - поет, ош я - йих сотворив.
Вни знавуть, ош навхтема м йих любив,
Айбо чомусь на вту любов ни збавуть.

Мої стихи живуть уже без мене,
В другых серцях глядавучи тепло.
Ни знаву як йим тамкы ся вело,
А я без них - усьов душов студеный.

Мої стихы - вчиненый мнов огинь,
Што має не лем гріти, а й - палити,
До боротьбы всьых русинüв будити
Й вести в слободный вд Украйины динь.

Мої стихы давно писав Духнович
И через мене вам йих передав -
Я силов свойых чуств йих пудживляв,
Й живу днись искров в йих страшнüм огньови.