Тко є файный бадогарь -
Бадогу клепає.
Остолош вчинив будар -
Уттüть ни влїзає.

Сокму маєш - файно робиш,
Нич ни кiвенуєш,
Ходиш собi по бовтах,
Мириндю купуєш.

Айбо є й такi, ги я,
На нич ни валовшнi:
Рукы крiвi, ногы крiвi,
Всьым и всяды довжны...

Хожу голый, хожу босый,
Голодный, нимытый...
Возьму голову у рукы -
Што  менї робити?!..

Пüшов бы м я грабовати -
Забють ня в темницю.
Пüшов бы м я ковдовати -
Копнуть ня в гузицю...

Туй ся я попризирав
Горi-дольü нынї,
Выжу: такых, ги я, тьма
В сьüв дурнuв крайинї.

Та ни всї такi, ги я -
Лїнiвi, завпсталi...
Подекотры доста файно
Туй ся впаровали.

Голодранцї и засранцї
Вчорашньым моментом,
Иннись усї - комерсанты,
Авать - прiзiденты.

Комерсантом я ни буду -
Ни знаву личити.
А вкрайинськым прiзiдентом
Чому бы ни быти?!..

Може тото, што я - русин,
Стане на завадї,
И вкрайинськым прiзiдентом
Ни озьмуть ня блядї?!

Тко Кравчук нацiонално?! -
Вiчный команїшта.
Й Кучма ни знать по-вкрайинськы
Ни слова вповiсти.

Раз сякi в них прiзiденты,
Та якi в них - люде?!..
Гий, буде з ня прiзiдент!
А вбы ня бüг - буде!

Гий, бо я ся розгаздуву,
Розпрiзiдентуву:
Всьых багатых - награджу!
Бiдных - поштровфуву!

Гий, бо в мене буде - всьо!
А в тебе - ни буде!
Прiзiдентом на пüвставкы
Убирiть ня, люде!

Сiмволами прiзiденства
Наохтема iзбiрьом
Ложку з вилков оповiтi
Лем гузичным папiрьом!

Дымократ и гуманiшта,
З людьми ся поражу,
Што чинити з калгозами?!..
Най люде пудкажуть!

А кой люде ми пудкажуть,
Учиню по-свому:
Всьых - на поле, всьых - у гнüй!
Робiть по-старому!

Пак, после икономiчно,
Ги Кравчук, тупый им:
Розпродам усї заводы -
Най робочый выє.

Бо заводы ни йому,
Ай тым, в кого - грошi...
З усьыма, тко за границив,
Буду я хорошым.

Бо де долары клепавуть!?
Ачий - за кордоном!
А вкрайинськi дуракы
Най iдять купоны...

Й раз украйинце гойчать:
- Закарпаття з нами! -
Та най буде - мы согласны
Керовати вами...

На мой душу, каждый хахол
Чуствовати мусить,
Ош у нього прiзiдентом
З Пüдкарпатя русин.

Вчиню, вчиню украйинцям
Правову диржаву -
Тот, тко буде мати грошi,
Буде мати й право!

Голых - вдїву, босых - вбуву,
Бiдных - нагодуву,
Щи й освiту из културов
Вшытку риформуву.

По освiтї: дам два значкы
З бадогы склепати
Такi: “Сись читати годен!”,
Й – “Сись годен писати!”.

Вбы реформа и в културi
Ни пропала дурно,
Будеме значок вручати:

“Чоловiк културный!”.

Лем за вты значкы ся треба
Всьый живüт бороти
Ниграмотно, никултурно -
Так ги было й доты.

Рилiгiйный вопрос пудню
Уд зимї до неба:
Тко ся молить - най ся молить,
Тко ньит - та й ни треба.

Для вчорашньых команїштüв
Вчиню два сурпризы:
Тко каже, ош вiрує в Бога,
Та най носить ризы!..

Щи: началникы, мiнiштры,
Злодїї законнi
Можуть мати дачi лише
В чорнобыльськüв зонї.

В Ардановi, вать в Осойи
Столицю учиню -
Там май лїпшу в цiлüм крайи
Варять палинчину.

А в Кыйовi будуть жити
Умом низдоровы:
Полїтикы, писатилї… -
Иншi ковдошове.

Первый раз у всьому свiтї
Жüнськый вопрос рiшу:
Кить у жоны муж мынкавый -
Прiзiдент ї втїшить!..

Сиксуалнi меншины
Волю будуть мати:
Тко тя згрüб, та тот тя вїб -
Й ни смiєш квичати!

Вбы файно жив й наркоман,
Вбы забыв за горе,
Дам засїяти колопньов
Вшыткый острüв Форос.

Розоружiня.... Пушкы
Людьом подїлити -
Думаву, ош люде знавуть
Што з пушков чинити!..

Айно ... Там щи дїлять флот -
Вто ми труд сїзїфüв:
Знаєш плавати - плавли,
Не знаш - сїдай в шiфу!

Обы йзїсти великоє,
Треба го здрüбнити.
Кой дїлили сьме Союз,
Вчив им ся дїлити.

Я - вкрайинськый прiзiдент -
Йсю науку знаву,
И Вкрайинську империю
Аццяк подїляву:

Украйину - украйинцям,
Крым лише - крымчанам,
Пüдкарпатя - русинам,
Галич - галичанам...

Щи указüв та приказüв
Наздаву до бога!
А потому вшыткы спалю -
Туды йим дорога!

Кой всьо пüде по графiку -
Дождї та й зарплаты,
Дам дїтьом трон прiзiдентськый -
Можуть в нього срати...

Кить украйинце ни годны
Без сиї забавкы,
Най робить в них прiзiдентом
Клїнтон на пüвставкы.