СЛОВО И ДЇЛО РУСИНСЬКОГО ВОЗРОЖДЕНИЯ

Спередслово  до книгы Александера Духновича

“Я - РУСИН”,

удрукованої 2010 года в Ужгородї

            Вначалї в русина было слово.

            И было вто русинськоє слово уд Бога.

            И за Божым повеленійом заселив русин зимлю пуд Карпатами, и зачав вести своє газдüство.

            Денно й нощно убраблявучи свою зимлю, денно й нощно у щирых молитвах русин благодарив Господа Бога.

            И коли Господь Бог возжелав укріпити дані ним народам Європы бисїды литературно,та дїла сього дав каждому європському народови свого пророка: чехам – Коллара, словакам - Штура, мадярам – Петефія, полякам – Міцкевича, руськым – Пушкіна, а русинам – Духновича.

            Гикой и каждому истинному пророкови, дав Господь Бог Духновичови як низміримо великый талант, так низміримо тяжкоє житя.

            Смиренно восприняв Духнович йсї Божі дары, и на вшытку силу трудився на поли русинського слова и духа.

            Айбо послав Господь Бог Духновичовому народови – русинам – великоє испытаніє: ни дав нараз русинам свої державы.

            Гикой сонных великанüв, кобылловали русинüв на йих русинськüв земли разні прийшлі народы: мадяре, чехы из словаками, руські, украйинце.

            Айбо настав час нынї русинам пробудити ся уд йих вікового спаня.

            Божым повеленійом учули русины слово свого Будителя Духновича, протерли очи и увідїли, ош ногами стоять на данüв йим самым Господом Богом земли, а в серцях свойых чувуть нискоримый русинськый дух.

            А вто, ош Господь Бог повертає русинüв до свої русинської державы, засвідчує тото смертелно остроє сопротивленіє прийшлякüв нашому русинському возрождению.

            Допаскудилися урагы русинüв до того, што балтов бріхнї замахлися на святая святых русинüв – на Духновичово слово.

            Айбо, повіруйте ми, Духновичово русинськоє слово удержить ушыткы напасти.

            А з ним и мы – русины – удержиме, и, гикой за рождественськов звіздов, твердым ступляйом ступиме у завтрашный низависимый уд прийшлякüв динь.

         Бо знавуть русины за тот великый Божый закон: лем тото и буде поправдї жити, што урагы хотять нисправедливо изничтожити. 

            Иппен сисе урозуміли свойыма серцями истинні русины, добрі спонсоры й не лем словом, а й фінанчнов пудпоров благословили у путь до свого русинського народа йсю книгу нашого безсмертного Будителя Духновича.

            Ушыткым свойым єством почуствуй, дорогый русине, ош є в нас из тобов на нашüв русинськüв земли и нашоє полуменївучоє, нивгасимоє русинськоє слово.

            Сам Господь Бог свойым духом удыхнув живу искру в русинськоє слово, Духнович роздув тоту половінь, а мы з вами, дорогі русины, у сьому божественнüм сяйві русинського слова попоникайме на себе днишньых, прозрім у завтрашный динь, и – йдїм!

            Дуже сміло йдїм, бо:

                                               З нами Бог!

                                               З нами Духнович!

                        До дїла, русины!

Попозирайте мüй

старый сайт:
http://gafya.narod.ru/

Дзеркало сайта

http://petrovtsiy.ltd.ua/

Tegs:

русинськи русинські співанки писни пісні фигли колядки, іван петровцій, вірші петровція, іван петровцій біографія, русины народ, закарпатские русины, русины на украине, становище русинів у галичині, галицкие русины, карпатские русины, русины фото, русинське радіо, русины, русини, русинська мова, русинский язык, русинська нація, русинська музика, русинська родина, русинськi співанкы, русинськi стихы, русинська правда, русинская литература, русинська література, русинская поэзия, русинська поезія