ЮРІЙ ЧОРІ - ЗИРЬКАЛО РУСИНСЬКОГО ВОЗРОЖДЕНИЯ

Спередслово до книгы Юрія Чорі

“Нискореный русин”,

удрукованої 2010 года в Ужгородї

  Истинна история не лем тото, што происходило вікы и вікы тому.

  И вчорашный динь – история.

  А щи кить перепозировати историю русинüв – май давнїшого народа Європы – якому Бог судив жити в самому центрі сиї части світа, урозумієме

вшытку сложнüсть и тяжкüсть нашого бытя як май давного, так днишнього.

  Переповісти - поетично ! - стихами ! – историю рüдного народа лем за час свого живота узявся сїмдисятсїмрüчный русинськый писатиль Юрій Чорі.

  И – переповів: досяг покладеної цїли.

  Жывучи на днишньüв Пüдкарпатськüв Руси чилядь добре знає Юрія Чорі не лем як плодотворного писатиля, автора бüлше гикой сїмдисяти книжок, но и як высокопорядочного чоловіка, истинного патріота рüдного русинського народа и краю.

  Иппен сисї якости – поряднüсть, нискоренüсть, вірнüсть свому рüдному народови – й привели Юрія Чорі щи вüсьüмнадцятьрüчным у совіцькі тюремні лагры.

  Айбо й темниця ни зломила волелюбного русина – герой поемы “Нискореный русин” веде свою боротьбу за низависимüсть рüдного русинського народа … до повної побіды.

  Правда, побіда щи лем у мечтах Юры, айбо каждый, тко прочитать сисю написану кровльов серця книгу, переймеся истиннов віров у завтрашньоє – а. годно быти, щи й днишньоє ! – торжество русинськых идеалüв.

  Щи в самому началї поемы Юра Русин твердо каже лупиголовому представитильови Кыйова:

  Мüй край -

  се Пüдкарпатська Русь

  И была,

  є

  и буде !

  Цинїзм – тüйтакый нацизм ! - Кыйова в удношіню до русинüв – ош такого народа ниє… - здвигає истинну габу боротьбы русинüв за свою низависимüсть.

  Болить серце Юры Русина, ош на його днüв земли так ся збыткувуть из русинüв украйинські нацїоналїсты:

  Де ни пüдеш –

  по районах

  Всяды вни при власти…

  А коли русины яли ся голосити світови, убращати ся в меженародні правозащитні организациї:

  Кыйов став протестовати,

  Й нас клясти при сьому.

  Поема “Нискореный русин”написана май великым фолклористом нашого краю. Читавучи її, точно видиме, ош вірнов учитильков у творчости Юрія Чорія была русинська народна епічна спüванка, котра розповідає за конкретні историчні события й доносить нам конкретні имена.

  Иппен тому Юрій Чорі з гордостив называть конкретні имена днишньых защитникüв и подвижникüв русинської идеї на Пüдкарпатськьв Руси. Помеже ними и герой поемы Юра Русин, котрому автор подаровав у поемі историю свого житя.

  Интересно зачинена поема й за свойыв стихотворнов ритміков – мінявучи мелодику стиха, автор мінять и настроєвüсть нашого сприйнятя сюжета. А сисе вже є проявом истинного писатильського майстерства.

  И в тот же час поема “Нискореный русин” ни є дїла Юрія Чорі самоцїльов, ай способом высловленя идей, проявом житя, провказом русинської нискорености.

  Юрій Чорі – истинный, великый русинськый патріот.

  Мы ся ним гордиме. И ся схыляєме сперед ним – поетом.

  Иппен сам Юрій Чорі ни схыляться до принижованя себе у якыйись ряд – овüн нам напоминать сячену свічку, яка ни в божому храмі, ай на май чяжкому русинському пути тым яскравіше нам світить, чим бüлше наші нинависникы сївуть сперед нас темноты.

  Мы – русины – идеме за ним, а кить инколи изза русинонинависницької темноты його й ни видиме, та чуєме його нивмираємоє слово.

  Мы – русины ! – йдеме на голос безсмертного русинського слова Юрія Чорі.

Попозирайте мüй

старый сайт:
http://gafya.narod.ru/

Дзеркало сайта

http://petrovtsiy.ltd.ua/

Tegs:

русинськи русинські співанки писни пісні фигли колядки, іван петровцій, вірші петровція, іван петровцій біографія, русины народ, закарпатские русины, русины на украине, становище русинів у галичині, галицкие русины, карпатские русины, русины фото, русинське радіо, русины, русини, русинська мова, русинский язык, русинська нація, русинська музика, русинська родина, русинськi співанкы, русинськi стихы, русинська правда, русинская литература, русинська література, русинская поэзия, русинська поезія